Македонската ракометна репрезентација загуби од Египет со 32-25 на првата од двете предвидени контроли во Каиро. Избраниците на селекторот Кирил Лазаров паднаа во второто полувреме, кога домаќинот ја направи клучната разлика.
Во првиот дел нашите ракометари беа рамноправни и натпреварот се играше речиси гол за гол, а на паузата „фараоните“ водеа со 12-10. Играта на Македонија комплетно падна во последните 15 минути кога при резултат 19-18, домашната селекција направи серија од 4-0 и стигна до опиплива предност.
Селекторот во финишот им даде шанса за деби и на младите Митев, Атанасијевиќ и Симоноски. Последниот гол на натпреварот беше дело на Кузманоски од пенал за конечни 32-25.
Никола Митревски на голот имаше 11 интервенции, Филип Талески беше најефикасен во нападот со шест голови.
Утре од 17 часот, Египет и Македонија ќе го одиграат и вториот пријателски натпревар.