Во пресрет на почетокот на новата сезона во НБА лигата магазинот Форбс ја објави листата на тимови кои имаат најголема вредност.
На чело на листата е Њујорк кој во изминативе две децении само еднаш успеал да се избори за настап во разигрувањето за титулата, а вредноста на тимот е проценета на 5,8 милијарди долари. На втората позиција се наоѓа Голден Стејт со 5,6 милијарди, а на третото место е Лос Анџелес Лејкерс со сума од 5,5 милијарди.
Далеку зад водечката тројка е Чикаго кој е проценет на 3,7 милијарди, а меѓу петте највредни тимови е Бостон со сума од 3,6 милијарди долари.
Меѓу десетте највредни тима го нема бранителот на трофејот Милвоки, а во оваа категорија се наоѓаат уште Лос Анџелес Клиперс, Бруклин, Хјустон, Далас и Торонто. Инаку шампионот во НБА лигата е на 17-тото место со проценета вредност од 1,9 милијарди долари.
Форбс потенцира дека ова е прв пат во историјата три тима да ја надминале вредноста од пет милијарди долари, а и покрај пандемијата и намалените приходи тимовите во оваа сезона успеаа да ја зголемат вредноста во просек за 13 проценти.