Бојкот на наставата има во некои основни училишта во земјава. Родителите на учениците бараат да се стопира донесувањето на Законот за учебници. Од Министерството за образование и наука, пак, велат дека причината за бојкот е неоснована и апелираат учениците кои денес не се дел од часовите, да ја продолжат наставата и успешно да ја завршат учебната година.
Ученици од неколку основни училишта во Скопје, деветтоодделнци од едно училиште во Тетово, но и во некои училишта во земјава ја бојкотираат наставата со образложение дека се против реформите во образованието што сака да ги спроведе ресорното Министерство. Дел од нив се соочуваат и со притисок дека ако не се вклучат на часовите ќе добијат неоправдани изостаноци.
Родителите на децата кои бојкотираат настава, своето незадоволство го искажуваат на социјалните мрежи и велат дека се одлучиле на ваков чекор бидејќи сметаат дека воведувањето на дигитални учебници негативно ќе влијае врз децата, кои и така постојано се пред компјутерот.
Според Министерството за образование и наука причината за бојкот е неоправдана и порачуваат учениците кои денес не се дел од часовите, да ја продолжат наставата и успешно да ја завршат учебната година. Од таму упатуваат апел за разумност и повторно приклучување кон останатите деца од нивните класови, затоа што постапката не оди во прилог на нивната едукација. Секој пропуштен час, особено сега кога воспитно – образовниот процес се организира во вонредни околности и во услови на пандемија, значи пропуштено знаење, кое тешко се надоместува, велат од Министерството за образование и наука.
Данијела Билбилоска