Србија, заедно со Велика Британија, со повеќе од 636.000 вакцинирани е меѓу водечките европски земји по бројот на дадени дози вакцина против коронавирус на 100.000 жители, но во исто време е на чекор до заострување на епидемиолошките мерки затоа што новите статистички податоци укажуваат на зголемување на бројот на нови случаи и хоспитализации.
Можно е Кризниот штаб денеска да донесе одлука за целосно затворање на угостителските објекти, вклучително и рестораните во хотелите, бидејќи се покажа дека престојот на илјадници луѓе на Копаоник и Златибор придонеле за скокот во бројот на заразени.
Во меѓувреме, на институтот Торлак се подготвува терен за производство на руската вакцвина Спутник V. Денеска почнуваат преговорите со руските експерти кои вчера допатуваа во земјата. Според министерот за иновацијски развој, целиот циклус за производство на вакцината би траел девет до десет месеци.