Македонската ракометна репрезентација се пласираше во втората фаза на Светското првенство во Египет по денешната победа од 32-29 во последното коло од групата Г.
Нашите ракометари се вратија психолошки по двата тешки порази во првите две кола од Шведска (12 разлика) и Египет (19 разлика). Ова е шеста победа против Чилеанците во шестиот меѓусебен натпревар, четврти на големите натпреварувања.
Победата ја остваривме со добра игра во второто полувреме, бидејќи по првиот дел имавме негатива од 16-17. Кон средината на вториот дел имавме добра серија од 5-1 по која поведовме со четири голови разлика. Игравме рутинирано и ја одржувавме предноста до самиот финиш за конечни 32-29.
Никола Митревски блескаше на голот со 14 интервенции, додека во нападот Кире Лазаров беше најефикасен со осум голови и воедно го одигра својот 40-ти меч на Мундијалите. Никола Костески и Жарко Пешевски постигнаа по пет погодоци.
Во главната фаза од турнирот, Македонија ќе вкрсти со групата Х, а таму наши ривали ќе бидат Русија, Словенија и Белорусија.