Непотизам, односно вработување на блиски лица на поранешни и сегашни функционери, злоупотреби со апанажите, патните трошоци, службените возила и платежните картички во странство, се само дел од бројните случаи за кои антикорупционерите дале препораки, но никој не ги зема предвид.
Дадени се опомени и насоки и за разрешување, но раководните лица во управните и надзорните одбори не ги почитуваат. Во последно време се злоупотребува и функцијата в.д. директор, а беше укажано и на најновиот случај со Куштрим Рамадани, кој е поставен за претседател на Управен одбор во МЕПСО.
Граѓанските организации укажаа дека антикорупциската комисија е немоќна ако нема независно судство што ќе ги истера случаите до крај. Потсетија на случаите за време на пандемијата, кои не завршија во судница.
Министерството најавува национална антикорупциска стратегија, но и тие сметаат дека законите во овој случај не се доволни.
Шефот на Делегацијата на ЕУ, Дејвид Гир, рече дека корупцијата не е само наш проблем, туку е предизвик со кој се соочуваат сите држави во светот.
Еден од заклучоците од дискусијата е дека, освен преку личен пример и професионално однесување, потребно е и зголемување на бројот на конечни пресуди за корупција на високо ниво, вклучително и со конфискација на имот стекнат на криминален начин.
Далиборка Демјанска Цветановска