Лицето што сменило адреса а не поднело барање за нова лична карта во рок од 30 дена, ќе треба да плати казна од 250 евра. Според новиот закон, казната за ист прекршок е неколку пати помала – од 50 до 100 евра. Но, нов закон – нема. Собранието не стигна да го измени овој и уште неколку десетици закони и да ги намали глобите за различни прекршочни дела пред да се распушти. Не е во функција точно половина година. Останаа неразгледани 15-тина закони од областа на земјоделство, транспорт, труд и здравство, 25 од финансиската област, или вкупно, повеќе од 100.
Новиот Парламент е веќе „затрупан“ со работа. Должност му е да ги решава сите прашања што ги отвара почетокот на школската година, здравствената криза и економските последици. Мерките поврзани со организирањето на наставата, следењето он-лајн, работата во мали класови, програмските измени или поместувањето на стартот од 15-ти септември е невозможно без измени на законите и функционален Парламент. Стопанството го очекува ветениот четврт пакет економски мерки, невработените субвенционирање, а сите граѓани исполнување на ветувањата за поефикасна заштита од пандемијата и ублажување на последиците.
И покрај ветувањата за брзо составување Влада со целосен политички легитимитет и ефикасно парламентарно мнозинство, уставните рокови се исцрпуваат до максимум. Претседателот го предаде мандатот само ден пред крајниот рок, а СДСМ и ДУИ веќе 12 дена разговараат со минимален прогрес.
По денешните разговори на генералните секретари Љупчо Николовски и Артан Груби, двете партии објавија соопштение дека преговорите ќе продолжат и дека очекуваат во наредните денови да биде постигнат договор. До тогаш, разговараат за поделба на ресори и за соодветни кадри.
СДСМ и ДУИ: Откако двете партии ги утврдија коалициските принципи и определби, се работи на усогласување на изборните програми. Во тек е распределба на одговорности според ресори, процес во кој се постигнати добар напредок и начелни согласности. Двете партии се обврзаа да предложат соодветни, подготвени, чесни и способни кадри. Учесниците во преговорите во целост ја разбираат итноста и потребата за постизборна консолидација на институциите и очекуваат дека во следните денови ќе биде постигнат конечен договор.
И денеска, не се споменува дали е најдена солуција околу најспорното прашање – премиерската функција. СДСМ и ДУИ, заедно со ДПА, имаат мнозинство од 62 пратенички мандати. До втори септември, мандатарот треба да му го предложи на Собранието новиот владин состав и програмата за работа на идната Влада.
Соња Николовска