Народна банка ќе ги преземе сите расположливи правни средства против сопствениците на Еуростандард банка за невистините и клеветите по донесување на Решението за укинување на дозволата за основање и работење на Банката, соопштија денеска од НБРМ, без притоа да прецизираат што подразбира тоа.
Бизнисменот Трифун Костовски како главен акционер на Еуростандард банка вчера обвини дека случајот е „сценарио коешто е правено со месеци наназад за никој да не знае, а само блиски до тие кругови од Народна банка на време биле известени да си ги повлечат парите“ и најави тужба против државата и НБРМ пред меѓународен суд.
Од НБ денеска повторија дека сите мерки кои ги имаат преземено кон Еуростандард банка за заштита на депонентите на банката и уверуваат дека банкарскиот систем е и останува стабилен и сигурен како и сите други банки и штедилниците.
Народната банка исто така укажува дека сопствениците имаат законска обврска да обезбедат капитал за покривање на загубите на банката. Банкарскиот систем е во одлична кондиција, при што сите банки се подготвени да одговорат на потребите на населението и компаниите, соопшти Македонската банкарска асоцијација по пропаѓањето на Еуростандард банката. Потенцираат дека пензионерите и корисниците на парични права треба само да појдат во банка каде што веќе имаат активна сметка или да отворат нова сметка во банка и не е потребно да побараат одјава. Банките и штедилници се отворени и за рефинансирање и на кредитите на клиентите на „Еуростандард банка“. Со соопштение се јави и Комерцијална банка дека нема побарувања од Еуростандард банка и нема хипотека на зградата.
“Точно е дека компанијата Гофи користи долгорочен кредит од Комерцијална банка во износ од околу пет милиони евра. Побарувањето на Комерцијална банка по овој кредит е обезбедено со т.н. зграда на Поштенска банка и со дел од зградата Палата Македонија. Зградата на Еуростандард банка не е под хипотека во Комерцијална банка, како што можеше да се стекне впечаток од изјавите дадени на вчерашната прес-конфереција, се наведува во соопштението на Комерцијална банка.
