Околу 300 членови на СОНК се собрани пред седиштето на Синдикатот, предизвикани од текстови во некои медиуми кои од сношти пренесуваат дека раководството прифатило зголемување на платите за 12% и дека штрајкот дефинитивно завршува со денешниот ден.
Очекуваат да излезе некој од раководството на СОНК да излезе и да им каже што е точно. Тие не даваат изјави.
Пред седиштето на СОНК пристигнаа и полицајци кои се грижат за редот. Репортерот на Телма, Сотир Трајков, јавува дека повеќе вработени во градинките тврдат дека врз нив се вршат притисоци за прекин на штрајкот, бидејќи во спротивно ќе добиеле откази од работа.
На протестот се присутни вработени од училиштата и градинките во Аеродром и Кисела Вода а најавено е и присуство на членството од Радовиш.
Вчера лидерот на СОНК по средбата со претставници од Владата кажа дека се очекува штрајкот да заврши, но дека за тоа Советот на СОНК треба да донесе одлука. Советот е закажан во 16 часот.