Францускиот министер за финансии Бруно Ле Мер изјави дека се подготвува ембарго на руската нафта на ниво на ЕУ, додавајќи дека и францускиот претседател Емануел Макрон го сака овој потег.
„Се надевам дека во наредните недели ќе ги убедиме нашите европски партнери да престанат да увезуваат руска нафта“, изјави Ле Мер за Радио Европа 1.
Зеленски: Руската нафта се плаќа со крв
Украинскиот претседател Володимир Зеленски рече дека европските земји кои продолжуваат да купуваат руска нафта заработуваат пари од крвта на другите луѓе.
Во интервју за Би-Би-Си, Зеленски ги издвои Германија и Унгарија, обвинувајќи ги дека го блокираат процесот на ембарго, а Русија може да заработи до 250 милијарди фунти од продажбата на енергија оваа година – повеќе од една третина во споредба со минатата година.
Расте незадоволството кај украинското раководство од Германија, која поддржа некои санкции против Русија, но не поддржа построги мерки во однос на продажбата на нафта.
„Некои од нашите пријатели и партнери разбираат дека сега е поинакво време, дека веќе не е прашање на работа и пари. Тоа е прашање на опстанок“, рече Зеленски.