Македонската фудбалска репрезентација славеше со убедливи 4-0 на гостувањето кај Лихтенштајн во рамки на квалификациите за Светското првенство во Катар 2022 година. За селекторот Благоја Милевски ова беше прв триумф откако седна на клупата на националниот тим.
Дарко Велковски го најави триумфот во 39.минута, откако претходно Александар Трајковски, Елиф Елмас и Милан Ристовски не реализираа добри шанси за гол. Езгјан Алиоски зголеми на 0-2 во 66.минута откако реализираше од пенал. Бобан Николов со прекрасен соло-гол погоди за 0-3, а точка на натпреварот стави Дарко Чурлинов во 83.минута.
Со оваа победа Македонија се искачи на 2.место на табелата во Групата Ј со 12 бодови, шест помалку од лидерот Германија, кој вечерва ја совлада Романија со 2-1. Ерменија вечерва ремизираше 1-1 со Исланд и има исто така 12 бодови, потоа следува Романија со 10, Исланд има пет, а Лихтенштајн е последен со 1 бод.
Македонија следниот натпревар го игра во Скопје во понеделник на 11 октомври кога ја пречекува Германија.
