Една година од одлуката за спомен-обележјето, време е за одговори, велат од кочанското Здружение „16 март“ на родители и блиски на загинатите во трагедијата во „Пулс“.
Родителите потсетуваат дека уште лани во јуни во Собранието бил прифатен амандманот поднесен од пратеникот Миле Лефков, пратеник во Собранието од ВМРО-ДПМНЕ, со кој беа обезбедени два милиона денари како првични средства за идејно решение и отпочнување активности за спомен-обележје во чест на младите кои ги загубија животите во трагедијата во „Пулс“.
Во самото образложение беше наведено дека барањето е координирано со родителите на настраданите, а амандманот беше прифатен и изгласан.
На денешниот ден, пред една година, на 23.06.2025, истата одлука е објавена во „Службен весник на Република Северна Македонија“ бр. 126, како Одлука за прераспределба на средства помеѓу буџетските корисници на централната власт и помеѓу фондовите за 2025 година.
„На средбата со министерот за култура и туризам ни беше кажано дека средствата предвидени минатата година биле искористени за други намени, но дека во текот на оваа година ќе се направи нова прераспределба за реализација на спомен-обележјето“, велат од Здружението и наведуваат дека во поткаст, министерот за култура и туризам, Зоран Љутков, изјавил дека оваа година повторно преку прераспределба се влезени во буџет за 2026 и обезбедени два милиона денари за спомен-обележјето.
Во ФБ статусот е наведено дека Љутков навел дека според сознанијата со кои располага Министерството веќе се работи на основниот проект и дека средствата би се реализирале преку Општина Кочани кон инвеститорот – Здружение на граѓани „16 Март 2025 – Кочани“.
-Овие јавно достапни информации, заедно со информациите добиени на средбата на министерот со родитлите, се основата за поставување на следните прашања:
– Дали најавената прераспределба за оваа година веќе е донесена и каде е јавно објавена?
– Дали постои формален акт за пренос или определување на средствата за оваа намена?
– Кога средствата ќе бидат ставени на располагање за реализација ?
– Кога средствата би биле префрлени до инвеститорот и под кои услови?
– Дали одлуките донесени во Собранието и објавени во Службен весник остануваат само на хартија или треба да добијат реализација?
– И конечно — дали меморијал од вакво значење требаше да биде целосно инициран, поддржан и реализиран институционално од Република Северна Македонија, наместо семејствата паралелно да бараат дополнителни начини за обезбедување средства преку донации?, велат од Здружението.
Тие потсетуваат дека спомен-обележјето не е само проект туку и место на сеќавање, достоинство и траен однос кон 63 прекинати животи.