Предметот го добив минатиот четврток и оттогаш интензивно го разгледувам и работам, а за одлуката јавноста ќе биде известена, ни изјави во телефонски разговор обвинителот од Вишото јавно обвинителство Јован Цветановски.
Предметот за „мазутот“ односно разгледување на приговорот на ЕСМ му се падна во работа на Цветановски, потврди вчера и државниот обвинител Ненад Савески.
Савески потврди дека после укинатата суспензија на Цветановски тој е вратен во распоредот во Вишото скопско обвинителство иако се уште трае разгледување на обвинителен предлог против Цветановски, во кое штипското обвинителство тврди дека заедно со екс Вишиот обвинител Мустафа Хајрулаху е обвинет за злоупотреби при распоредување на предмети.
Цветановски ни изјави дека обвинителниот предлог не го видел, но не е ниту во правна сила и за него има поднесено приговори, но тврди дека тоа нема никакво влијание врз предметот за мазутот и неговите актуелни задолженија.
Цветановски вели дека предметот за мазутот е обемен и кај него пристигнал во 60 кутии со докази и сознанија прибавени за време на запрената истрага за набавката на мазутот за ТЕЦ Неготино.
Мора да се прегледа и образложението за запирање на истрагата, но и обемниот приговор на ЕСМ за штета предизвикана од јавните набавки. За разгледување на приговори постои релативен законски рок од 30 дена иако при големи случаи како истрагата за мазутот е потребно и повеќе време.
Од друга страна, министерот за внатрешни работи Панче Тошковски во ТОП Тема најавува и нови докази иако ќе се чека одлуката на вишиот обвинител Јован Цветановски.
Истрагата беше запрена за Капушевски, Јахоски, Ковачевски, за фирмата РКМ иако МВР тврдеше дека има штета од над 167 милиони евра и злоупотреби при набавката на мазутот и доцнење на испораката на мазутот во ТЕЦ Неготино. Обвинителството ја запре истрагата со тврдење дека не се обезбедени доволно докази за покренување на обвинение.
Миомир Серафиновиќ
Б.С.