До министерот за здравство Азир Алиу досега формално не е пристигната оставка на Кедев дека се повлекува од здравствениот совет, велат од Министерството за здравство.
Известувањето за повлекување на кардиологот Сашко Кедев од здравствениот совет е примено во Министерството за здравство на 23 јануари годинава односно пред осум дена, ова го покажува документот кој го објави „360 степени“.
Во дописот на Кедев до Алиу се вели: „Ве известувам дека се повлекувам од работата на здравствениот совет на Министерството за здравство, од причина што сметам дека започнатите контролни процеси треба да ги спроведуваат исклучиво компетентни кадри со веќе докажан стручен и професионален кредибилитет“.
Повлекувањето на Кедев се случува во период кога Министерството за здравство веќе ангажираше странски експерти за да ги проверат наодите на домашната комисија која при проверка на 19, утврди десет случаи за извршени непотребни операции на срце или непотребно упатување на операции.
Откако во август минатата година кардиологоот Сашко Кедев искажа сомневање дека приватни болници правеле непотребни операции на отворено срце само за да земат државни пари, Министрерството најави итни и вонредни надзори.
„Ние во моментот се соочуваме со нешто застрашувачко, а тоа се тие непотребни интервенции кои се профит ориентирани. Имаме пролиферација на приватни болници на кои интересот им е профитот. Тоа се лесно докажливи работи, имаме докази дека одредени центри треба да се затворат од медицински аспект. Да се случува тоа во САД или Англија, тоа ќе биде под клуч. Оперирале без потреба, сечеле граден кош без потреба, за тоа имаме докази. Тоа треба релевантните институции да преземат нешто, здравство, Фондот. Зборуваме за многу сериозни етички проблеми, поврзани со профит“, изјави тогаш Кедев за Канал77.
Фондот за здравство на двете најголеми приватни болници во Скопје во текот на 2024 година им исплатил околу 17 милиони евра за речиси 2.500 интервенции. Па, од тука се поставува прашањето, како за само неколку години оваа сума се зголемила за една третина. Но, уште поважно, според поранешниот директор на фондот за здравство Никола Пановски, не се вклучил алармот кај надлежните да ја проверат ситуацијата.