Американскиот документ за безбедносни гаранции за Украина е целосно подготвен и се чека одредување датум и место за негово потпишување, изјави украинскиот претседател Володимир Зеленски за време на посетата на Вилнус. По потпишувањето, документот ќе биде испратен на ратификација во американскиот Конгрес и украинскиот Парламент.
Зеленски во Литванија се сретна со претседателот Гитанас Науседа, со кого разговараше за поддршката на украинскиот енергетски систем, воената соработка и заедничките одбранбени проекти. Тој го информираше и за разговорите меѓу украинската, американската и руската делегација во Абу Даби, нагласувајќи дека Украина продолжува да работи на завршување на војната.
Украинскиот претседател истовремено побара од сојузниците зголемена испорака на муниција за противвоздушна одбрана, поради интензивните руски напади со дронови, бомби и ракети. Зеленски истакна дека заштитата на украинскиот воздушен простор останува клучен приоритет во соработка со САД и европските партнери.