Околу 73 јужнокорејски државјани осомничени за вмешаност во онлајн измами се депортирани во Јужна Кореја за да се соочат со истраги. Според властите, станува збор за најголемата групна репатријација на корејски осомничени криминалци од странство досега. Осомничените се дел од околу 260 Јужнокорејци приведени во Камбоџа во последните месеци во рамки на акција против онлајн измами.
Се сомнева дека групата измамила жртви во Јужна Кореја за вкупно 48,6 милијарди вони, односно околу 33 милиони долари. По слетувањето на аеродромот Инчеон со чартер-лет, 65 мажи и осум жени беа пренесени во полициски станици низ земјата.
Случајот доаѓа по силната јавна реакција во Јужна Кореја по смртта на студент минатото лето, кој наводно бил присилен да работи во измамнички центар во Камбоџа и починал по тортура и тепање, што ги засили напорите за заедничка акција меѓу двете земји.
Т.Д.
