Утрово, Термоблокот 2 во РЕК Битола автоматски беше исклучен од електроенергетскиот систем. Причината е активирање на заштитниот механизам на блокот како последица на зголемена температура односно опожарени дрвени елементи во близина на ормарот за електронското управување.
Со оглед дека станува збор за потенцијална саботажа, веднаш по настанот, надлежните служби на РЕК Битола реагираа согласно оперативните протоколи. За случајот е известена криминалистичката полиција, која во моментов врши увид на местото на настанот со цел утврдување на сите околности.
По завршувањето на полицискиот увид, стручни екипи од РЕК Битола веднаш ќе започнат со детална анализа за согледување на евентуална штета и утврдување на точната причина за зголемувањето на температурата.
Во изминатиот период, производството на електрична енергија во РЕК Битола се одвива со намален капацитет. Термоблокот 1 е во редовен годишен ремонт, додека Термоблокот 3 е исклучен од мрежата поради актуелните намалени потреби за електрична енергија од страна на Универзалниот снабдувач ЕВН Хоум.
Не работи ниту ТЕЦ Осломеј, поради дефект кој се случи пред неколку дена. Од ЕСМ велат дека потребните количини струја ги обезбедуваат од хидропотенцијалот, а ако има потреба ќе се електрична енергија ќе се купи и преку домашната берза МЕМО.