Вкупната вредност на извозот на стоки од Македонија во периодот јануари – јули во 2024 година изнесува 4.567.7 милиони евра и бележи пад од 7.7 % во однос на истиот период од претходната година, соопшти Државниот завод за статистика (ДЗС).
Вредноста на увeзената стока, во истиот период, изнесува 6.489.9 милиони евра, што е за 0.8 % повеќе во споредба со истиот период лани.
Трговскиот дефицит, во периодот јануари – јули 2024 година, изнесува 1.922.3 милиони евра. Покриеноста на увозот со извоз, во периодот јануари – јули во 2024 година изнесува 70.4 %.
Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, деловите на седишта од подгрупата 821.1 и други катализатори на носачи.
Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и други моторни возила за превоз на лица.
Во периодот јануари – јули 2024 година, според вкупниот обем на надворешнотрговската размена, Република Северна Македонија најмногу тргувала со Германија, Велика Британија, Грција, Кина и Србија.