Македонската филхармонија, Софиската филхармонија и Државниот симфониски оркестар на Солун вечерва од 21 часот ќе одржат заеднички концерт во Градскиот парк во Скопје.
Настанот, насловен „Филхармонија на отворено“, ќе ја донесе пред публиката култната кантата „Кармина Бурана“ од германскиот композитор Карл Орф.
Со оркестарот ќе диригира маестро Најден Тодоров, а како солисти ќе настапат сопранистката Ана Дурловски, тенорот Николас Спанос од Грција и баритонот Иво Јорданов од Бугарија.
Во изведбата ќе учествуваат и Националната опера и балет, хорот на Музичкото училиште во Солун и детскиот хор „Пиколо“.
Концертот е бесплатен за посетителите и претставува продолжение на регионалниот музички проект кој претходно беше успешно изведен во Софија и Солун.
Според учесниците, настанот е пример за културна соработка и поврзување меѓу земјите од регионот.