Италијанската премиерка Џорџа Мелони го обвини американскиот претседател Доналд Трамп дека измислил приказна за неа со изјавата дека на самитот на Г7 го молела за заедничка фотографија.
Мелони порача дека е „вчудоневидена“ од неговите коментари и тврди дека се измислени во целост. Истовремено го обвини дека покажува многу повеќе обзир кон противниците на Западот отколку, што според неа, е случај кон долгогодишните сојузници.
Најновиот вербален конфликт означува нагло влошување на односите меѓу двајцата десничарски политичари и доаѓа по само неколку дена по самитот на Г7, каде се чинеше дека одат кон стабилизација по несогласувањата околу војната со Иран во текот на изминатите месеци.
На снимки од состанокот во Франција се гледаат Мелони и Трамп во долг разговор. Американскиот претседател подоцна сугерираше дека ѝ направил само услуга со тоа што воопшто разговарал со неа.
„Веројатно е среќна што разговарав со неа. Не морав да разговарам со неа“, кусо изјави Трамп за италијанската телевизија Ла7.
„Ме молеше да се фотографирам со неа. Толку сакаше да се фотографира со мене. Не би го сторил тоа, но ми беше жал, па се согласив“, додаде Трамп според преводот на ТВ Ла7.
Мелони набрзо му одговори.
„Тврдењата на Трамп се целосно измислени. Искрено сум изненадена. Не знам зошто претседателот на САД вака се однесува кон своите сојузници. Впрочем, не му е првпат. Има една работа што треба да ја запамети. Ниту јас, ниту Италија не молиме никогаш никого“, порача Мелони која беше единствена европска лидерка која присуствуваше на инаугурацијата на Трамп во 2025 година.