Кривични пријави за четири малолетнички кои учествуваа во инцидентот кон крајот на месец март во Ѓорче Петров кој ја вознемири домашната јавноста поради степенот на бруталност, а ќе одговараат и нивните родители. Во обвинителството постапката тече, а во училиштето наставничкиот совет им го намалил поведението или, пак, им изрекол укор на сите кои учествуваа во инцидентот. Малолетничката која е жртва во овој немил настан ја следи наставата од дома.
Од МВР соопштија дека кривични пријави во текот на утрешниот ден ќе бидат поднесени и против родителите на четирите ученички кои веќе се товарат за делото насилство.
„Единицата за внатрешни работи Ѓорче Петров до ОЈО Скопје поднесе кривична пријава против четири малолетнички, една 17-годишна и три 14-годишни, поради основи на сомнение дека извршиле две кривични дела „насилство“ предвидено и казниво по член 386 од КЗ.. Во текот на утрешниот СВР Скопје ќе поднесе кривична пријава и против родители на инволвираните малолетници“, соопшти МВР.
Според информациите на Телма, две од пријавените ученички не се од училиштето „Мирче Ацев“, туку од средното хемиско и друго основно во Општина Ѓорче Петров.
Сите мерки кои беа на располагање се преземени. Известена е полицијата, обвинителството, просветниот инспекторат и народниот правобранител, а училишното раководство уште во текот на минатиот месец им изрече санкции на сите инволвирани во насилството, соопшти градоначалникот Александар Стојкоски.
„Преземени се повеќе активности во периодот од 31 март до 15 април, кога од страна на наставничкиот совет, по собрани сите податоци, изречени педагошки мерки врз 10 ученици кои биле вклучени во инцидентот. Сите се со различен тип на вклученост во самиот настан и на кои соодветно на тоа им се изречени мерките. На три максимално им е намалено поведението во незадоволително, на двајца им е намалено на ниво на добро, а пет ученици се опоменати со мерката укор. Едно од децата ја следи наставата од дома, другите на кои им се изречени мерки ја следат наставата во училиштето“, изјави Александар Стојкоски, градоначалник на Општина Ѓорче Петров.
Од министерството за образование соопштија дека просветниот инспекторат постапува, а пратен е допис до градоначалниците и училиштата да се воведе дежурен наставник за време на одморите во училиштата.
„Се обративме и до градоначалниците, пративме допис и до училиштата дека мора да се врати една стара пракса која постоеше и покажуваше ефекти, а тоа е на големите и малите одмори да има дежурен наставник. Не дежурни ученици по ходниците. Не само по ходниците, туку и во дворот на училиштето. Наставниците мора да имаат увид во тоа како се однесуваат нивните ученици, бидејќи тоа е воспитно-образовен процес, не е само образовен, туку и воспитен“, информира Весна Јаневска, министерка за образование.
Од обвинителството соопштија дека се постапува согласно законот за правда за децата и кога ќе има конкретни информации кои може да се споделат со јавноста тоа ќе биде направено.
Огнен Чанчаревиќ