Македонските војници и офицери за крај на вежбата Блесок 26 пред врховната командантка, ресорниот министер и дипломатските гости покажаа зошто добија позитивна оценка од НАТО за декларираната единица на АРМ. Ако во НАТО го вреднуваат трудот според воспоставените критериуми тогаш истиот однос треба да го добиеме и од Европската Унија, рече претседателката Силјановска која рече дека се слушнала со победникот на бугарските избори, доскорешен нејзин колега Румен Радев, но за него е прашањето каков ќе биде неговиот и бугарскиот иден однос кон Македонија.
„Клучните документи на ЕУ бараат почитување на националните и културните идентитети, почитување на дигнитетот и интегритетот, молам компатибилност на стандардите. Впрочем, не случајно во рамките на НАТО, ние сме високо профилирани иако сме мала држава. Посакувам доколку сме подведени под стандарди кои важат за сите да ја докажеме и нашата компатибилност со европските политички системи и со стандардите на ЕУ “, рече Гордана Силјановска Давкова, претседателка на РСМ.
Армиската вежба Блесок заврши успешно по 12 дена.
„Во прав и во суровите услови на полигонот Криволак припдниците на АРМ повторно се покажаа, ги исполнија барањата на Алијансата и ги добија потребните оценки. За крај на вежбата „Блесок 2026“ беше спроведена операцијата „Воведување во офанзивни дејности на лесна пешадиска батаљонска група“, извести новинарот на Телма Миомир Серафиновиќ.
Со вежбата, армијата покажа и дел од новата опрема. Ги употреби новите возила и новокупената артилерија.
„Инвестираме многу во ново лично вооружување, во нови напредни капацитети, во силна сајбер одбрана, во нови оклопни возила и инженерски машини, беспилотни летала итн. За сето ова имаме план и силна поддршка од претседателката, и од Владата за што сум неизмерно благодарен“ рече министерот за одбрана Владо Мисајловски.
На вежбата Блесок 26 во Криволак учествуваа над 1.500 војници.
Миомир Серафиновиќ