Шеесет и седум пратеници гласаа „за“ да почне процесот за укинување на техничката влада на 100 дена пред избори. Законското решение предвидува елиминирање на досегашниот модел кој се применува од 2016 година, откако една година претходно, беше донесен Пржинскиот договор. Во образложението од Владата, која е предлагач, стои дека, целта е да се обезбеди поголема стабилност, правна сигурност и заштита на јавниот интерес преку доследно заокружување на реформските процеси.
Опозицијата побара да се симне од дневен ред затоа што е дел од реформската агенда и треба да се укине на ист начин на кој е и донесен. Еден од аргументите на мнозинството зошто опозицијата не треба да се плаши дека потегот е насочен против нив е и тој што се предлага законот да не важи од следните парламентарни избори, туку од тие по нив.
Според договорот, техничката влада стапува на сила сто дена пред парламентарните избори, со цел да обезбеди фер и демократски избори.Во неа, министрите за внатрешни работи и за труд и социјална политика ги предлага партијата во опозиција со најголем број пратеници во Собранието. Опозицијата, исто така, предлага дополнителни заменици-министри во уште три министерства.
Се менува и премиерот, но на предлог на актуелната власт.
Далиборка Демјанска Цветановска
