Бизнис секторот воспоставува врска со средношколците и студентите на штипскиот Универзитет „Гоце Делчев“ Штип. Над 50 компании се претставија на Отворениот и кариерен ден. Македонските компании се се поактивни на терен, со цел да ги привлечат младите и останат во државата.
„Постои тренд да компаниите се поактивни од порано. Тие нудат пракси, тие нудат дури платени пракси, нудат менторства, програми за да ги привлечат младите луѓе и да соработуваат“, изјави Дејан Мираковски ректор на УГД-Штип.
Од Стопанската комора сметаат дека реформите со дуалните паралелки во средните училишта се успешна приказна за македонското образование и бизнис секторот. Околу 4.000 компании се вклучени во практичната настава на средношколците. Истите реформи ги бараат и од македонските Универзитети, со цел да добијат високо квалификуван кадар во фабричките погони.
„Како што беше споменато недостигот на високо квалификувана работна сила се повеќе ќе станува хроничен проблем, а спојувањето на практиката и науката уште од самиот почеток на профилирањето на кадрите и те како може да придонесе да имаме лесно вработливи и препознаени кадари на пазарот на труд“, вели Татјана Штерјова Душковска Стопанска комора на Македонија.
Градот во кој текстилната индустрија е во слободен пад, изминатата деценија се развива инфраструктурно за потребите на студентите, како втор универзитетски центар. Според градоначалникот Јорданов на стопанските капацитети им недостасуваат инжињерски кадар.
„Трудоинтензивната дејност е дејноста која го намалува интензитетот на работа. Не само заради намалување на профитот, туку и заради се помалиот број на работоспособна, односно заинтересирана работна сила во овој сектор“, додава Иван Јорданов градоначалник на Штип.
Отворените и кариерни денови на универзитетите им помагаат на средношколците да ја избират својата идна професија, а во Штип се организираат веќе втора година од страна на Универзитетот „Гоце Делчев“ во соработка со Стопанската комора на Македонија и Општината.
Викторија Димитрова Јованова