Децата во Британија кои имаат 17 години или помалку, како и сите што ќе се родат во иднина, никогаш нема да можат легално да купуваат цигари, откако законодавците одобрија нови, построги ограничувања за пушењето, објави Ројтерс.
Законот за тутун и електронски цигари (Tobacco and Vapes Bill) ја зголемува законската возраст за купување тутун за една година – секоја година, почнувајќи од лицата родени на или по 1 јануари 2009 година, што значи дека тие генерации ќе се соочат со доживотна забрана.
Законот исто така ги заострува контролите врз електронските цигари, вклучително и забрана за продажба на вејпинг и никотински производи на лица под 18 години, како и ограничувања за рекламирањето, јавно објавување, бесплатно делење и попусти.
Британската влада тврди дека овие мерки ќе помогнат да се намали пушењето и да се спречат младите да станат зависни од никотин, со што ќе се намали долгорочниот притисок врз јавното здравство на Обединетото Кралство.
Министерот за здравство, Вес Стритинг, изјави дека усвојувањето на законот е историски момент за здравјето на нацијата.
„Децата во Обединетото Кралство ќе бидат дел од првата генерација без пушење, заштитена од доживотна зависност и штета“, рече тој.
„Превенцијата е подобра од лекувањето – оваа реформа ќе спасува животи, ќе го намали притисокот врз здравствениот систем и ќе изгради поздравa Британија“.
Проценките се дека пушењето предизвикува околу 64 000 смртни случаи и над 400 000 хоспитализации во Англија, според официјалните проценки и предизвикува трошоци во износ од околу 3 милијарди фунти секоја година, додека пошироките економските трошоци се над 20 милијарди фунти.