Најмалку десет лица загинаа, а 25 се повредени при напад со огнено оружје во средно училиште и во дом во местото Тамблер Риџ, во канадската провинција Британска Колумбија, соопшти полицијата.
Осум жртви биле фатално застрелани во средното училиште, додека уште две тела биле пронајдени во блиска куќа.
Осомниченото лице, за кое властите веруваат дека е напаѓачот, било пронајдено мртво во училиштето со, како што се наведува, самонанесена повреда.
Полицијата засега не го соопштува идентитетот, возраста на жртвите, ниту видот на употребеното оружје. Според медиумите, во итното предупредување испратено до жителите осомниченото лице било опишано како жена со кафеава коса облечена во фустан.
Канадскиот премиер Марк Карни изјави дека е „скршен од болка“ поради „ужасните пукања“ и ја откажа планираната посета на Германија.
Премиерот на Британска Колумбија, Дејвид Иби, го оцени настанот како „незамислива трагедија“, додавајќи дека ова е втор најсмртоносен напад врз училиште во историјата на Канада, по масакрот во Монтреал во 1989 година. Властите апелираат на трпение додека трае истрагата.