Комисијата за заштита на конкуренцијата (КЗК) изрече вкупно 13,4 милиони денари казни за четири трговски друштва и Сојузот на стопански комори на Македонија, поради учество во забранет договор што ја нарушил пазарната конкуренција.
Секое од трговските друштва е казнето со 3.075.000 денари, додека Сојузот на стопански комори, како координатор, ќе плати 1.143.000 денари. КЗК утврдила дека на состанок од 5 февруари во 2025 година, учесниците постигнале усогласен став да не прифаќаат нови или зголемени ценовници од добавувачите.
Со тоа, наместо независно делување, се воспоставила практична координација, однесување што претставува ограничување на конкуренцијата и строго е забрането според Законот за заштита на конкуренцијата. Глобите се изречени како превентивна мерка со цел да се спречат идентични нарушувања и да се обезбеди фер и слободна пазарна конкуренција.