Актуелниот генерален секретар на Антикорупциската комисија, Адем Чучуљ, е на чекор да се искачи едно скалило повисоко.
Со освоени 96,5 бодови од максималните 100, Комисијата за прашања на изборите и именувањата денеска го предложи за претседател на комисијата.
Од четворицата пратеници од ВМРО ДПМНЕ, СДСМ, Вреди и ДУИ, членови на Комисијата за селекција, Чучуљ добил од 95 до 100 бода, а речиси максимум бодови – 99, има и од претставникот од невладиниот сектор, Дарко Аврамовски.
Останатите претставници од граѓанските организации кои ги следеа дводневните интервјуа со кандидатите немале право на глас, но ни открија дека немаат никакви забелешки за изборот. Одлуката и на пратениците на денешната комисија беше едногласна.
Тонско Ѓорѓија Сајкоски, претседател ан Комисија за избори и именувања
Чучуљ е допломиран правник, со 19 -годишно работно искуство во Антикорупциската комисија.
Второрангиран на листата е дипломираниот економист, Бранко Смилевски, со 86,33 бода, а трет дипломираниот правник, д-р Кимо Чавдар, со 81,83 бода.
Во интервјуто пред комисијата за селекција, Чучуљ рече дека ќе се заложи за повеќе превентивни антикорупциски мерки и активности, како и за дополнување на регистрите на податоци за поефикасна проверка на имотната состојба на функционерите, бидејќи државата сè уште не го спроведува и не ги полни регистрите, а покрај тоа и не плаќа за набавка на таков антикорупциски софтвер.
Рече и дека, критиките во годинешниот извештај на Европската комисија за работата на комисијата треба да се прифатат и да се работи на нивно отстранување. Европскиот извештај констатираше дека ДКСК не е активна како порано и дека треба да работи проактивно и поефикасно за откривање на случаи на корупција извршена од функционери на власт.
Сега е на потег Собранието, кое треба со мнозинство да го изгласа предлогот на комисијата. Според најавите од законодавниот дом, гласањето за оваа точка ќе се одржи на пленарна седница во првата половина на декември.
Далиборка Демјанска
(Видео) Адем Чучуљ со највисок рејтинг за иден претседател на ДКСК
Б.С.