Тешка сообраќајна несреќа се случи на еден од најпрометните булевари во центарот на Скопје. Велосипедист загина на лице место откако бил прегазен од патнички автомобил. Крвта на асфалтот и искршената шофершајбна сведочат за загубениот живот. Автомобил од марката пасат околу 12 часот и 30 минути го удрил велосипедистот кој веројатно се обидувал да помине на пешачкиот премин во близина на мостот Гоце Делчев. Возачот потоа го оставил автомобилот и избегал, а полицијата трага по него. Се уште не е позната возраста на жртвата.
“Денеска (03.11.2025) околу 12.30 часот во СВР Скопје е пријавено дека на бул. „Гоце Делчев“ во Скопје се случила сообраќајна несреќа во која учествувале патничко возило „пасат“ со скопски регистерски ознаки, управувано од машко лице и велосипедист, кој починал на местото на настанот. По несреќата, возачот на возилото „пасат“ го оставил возилото и заминал од местото на настанот“, изјави Гоце Андреевски, портпарол на МВР.
Седумнаесет часа претходно и друг возач избега од одговорност за сторената тешка сообраќајна несреќа, исто така во центарот на главниот град. Синоќа околу 19 часот беше прегазена 79 годишна жена која поминувала на пешачки премин во близина на гимназијата Јосип Броз Тито, односно на улицата Димитрие Чуповски. Возачот на „фолксваген тигуан“ по сообраќајката го напуштил местото на несреќата, но полицијата успеа да го фати на Средно Водно. Жената со тешки телесни повреди е на клиника.
„Во несреќата со тешки телесни повреди се здобила 79 годишната М.М констатирани во Комплекс клиники „Мајка Тереза“. По несреќата возачот на пасат го оставил возилото и заминал од местото на настоанот. Во тек е увид и мерки за пронаоѓање на возачот“, додава портпаролот на МВР.
Црн биланс на патиштата во Скопје, имаше и минатата недела. На 28 октомври, на улицата Перо Наков во главниот град беше удрено 11 годишно девојче, а возачот на автомобилот не остана на местото на несреќата. Девојчето се здоби се здоби со полесни повреди и е пуштено на домашно лекување.
Во четвртокот и Кичево беше потресено од прегазувањето на девојче на 10 годишна возраст. Несреќата се случи на магистралниот пат Охрид – Кичево, а девојчето беше хоспитализирано и се бори за живот.
Марија Митевска