Единици на интерветната полиција при СВР Скопје синоќа го лишиле од слобода возачот кој пред три дена удри во 11-годишнo дете на улицата „Перо Наков“ во Скопје и побегна од местото на настанот.
Девојчето беше пренесено во Клиничкиот центар „Мајка Тереза“, каде лекарите констатираа тешки телесни повреди од ударот.
Како што соопштија од Министерството за внатрешни работи (МВР), станува збор за 59-годишен скопјанец со иницијали Б.Р., кој бил приведен синоќа околу 19:30 часот, откако по преземените мерки и активности, полицијата го пронашла и него и возилото.
Скопјанецот се сомничи дека на 28 октомври, околу 20:30 часот, на улицата „Перо Наков“ со возило „фиат сеиченто“ удрил во 11-годишното дете, по што со возилото го напуштил местото на настанот.
„Веднаш по добиената пријава, преземени се соодветни мерки и активности и возачот и возилото се пронајдени и Б.Р. по наредба на јавен обвинител е задржан во полициска станица“, се наведува во соопштението од МВР.
Оттаму додаваат дека по документирањето на случајот, против лицето ќе биде поднесена соодветна кривична пријава.