Економијата на Македонија расте, со проектиран раст од 3,1% во 2025 година, поддржан од силни јавни инвестиции и зголемен извоз. Според најновиот извештај на Светска банка за Западен Балкан, растот во првото полугодие од 2025 достигна 3,2%, пред сè поради домашната побарувачка и силната активност во секторите услуги и градежништво. Сепак, јавниот долг останува над 60% од БДП, а дефицитот сè уште ги надминува фискалните правила. Иако среднорочната прогноза е позитивна, со просечен раст од 3% до 2027 година, постојат ризици од слабеење на инвестициите и намалена економска активност кај трговските партнери. Светска банка предупредува и на потребата од поголемо учество на жените и младите на пазарот на труд, преку стекнување на соодветни вештини за новите економски услови. Забавувањето на инфлацијата се очекува да продолжи, со проекција дека до 2027 година ќе падне под 2%. Регионално, извештајот укажува на парадокс: недостиг на работна сила, а сепак висока невработеност и ниска стапка на учество, особено кај жените, младите и постарите. Проекциите покажуваат дека до 2050 година, работоспособната популација би можела да се намали за 20%. За да се обезбеди одржлив раст, се препорачува стратегија за подобри работни места, преку подобрување на продуктивноста, иновациите, дигиталната трансформација и создавање инклузивни и флексибилни можности за работа.
