Младинската ракометна репрезентација на Македонија го запиша и вториот пораз на Светското првенство во Полска и остана без шанси за пласман во главната фаза. Нашите надежи денеска беа поразени од Романија со минимални 27-28 и тоа откако прокоцкаа одлични +5 на полувремето.
Македонија одигра едно одлично прво полувреме, па веќе по десет минути игра ја анулираше почетната предност на Романците. На полувремето водевме со 17-12. Предноста на нашиот тим почна да се топи кон средината на вториот дел, а последната комотна предност ја имавме со 23-19. Романците ја променија тактиката и применија игра „седум на шест“ во нападот. Нашата реализација затаи, а имавме и неколку технички грешки па Романците израмнија на 24-24. На три и пол минути до крајот дури и поведоа со 25-26. Во финишот игравме брзоплети со неколку нереализирани напади, а романскиот голман имаше три одлични одбрани за да ѝ донесе победа на својата репрезентација од 27-28.
Димитар Узунчев со седум голови беше најефикасен во нашиот табор, Мирче Калајџиески имаше пет, додека Валентин Карасманакис реализираше четири пати во противничката мрежа.
Македонија во последното трето коло од групата Ф во сабота ќе игра со Исланд, кој денеска ремизираше со Фарски Острови 35-35. Турнирот нема да заврши тука за нашите надежи, бидејќи ќе играме во Президент купот за што подобар пласман на турнирот.
