Лука Дончиќ го одигра најдобриот натпревар за Лејкерс по пристигнувањето од Далас, па тимот од Лос Анџелес го декласираше Денвер на гостински паркет.
Лејкерс ја прекинаа победничката низа на Нагетс од девет натпревари и славеа со 100-123. Дончиќ беше лидер на гостите од Лос Анџелес со 32 поени, 10 скока и седум асистенции. Словенецот беше подржан од Леброн Џејмс со 25 поени, Остин Ривс имаше 23, а Руи Хачимура постигна 21 поен.
Кај Денвер, Арон Гордон беше најефикасен со 24 поени, додека Никола Јокиќ го заврши натпреварот со трипл-дабл со 12 поени, 13 скока и 10 асистенции.
Интересно, ова беше прва победа на Лејкерс против Денвер уште од април 2022 година и имаа 13 порази на последните 14 меѓусебни пресметки.
Чикаго на домашен паркет загуби од Феникс со 117-121, Бруклин се радуваше на гостувањето кај Филаделфија со 103-105, а Јута беше подобра од Хјустон со 124-115.
Портланд испиша нова клупска историја со најубедливата победа досега од 53 поени разлика против Шарлот, односно славеше со 141-88.