Широки надлежности а ограничени кадровски и финансиски капацитети е рецептот за ризик од корупција во Општините, покажува истражувањето на Центарот за граѓански комуникации во рамките на проектот „Заштита од корупција“ кој беше презентиран денес.
Спроведување на јавни набавки, урбанизмот и доделување на градежни дозволи продажба на градежно земјиште, речиси никаков инспекциски надзор, доделување на Б интегрирани дозволи и приходите се клучните полиња каде има најголем ризик од корупција.
Под лупа на Центарот за граѓански комуникации биле осум општини – Битола, Куманово, Струмица, Штип, Тетово, Кичево, Чаир и Неготино. Изработени мерки со кои треба да се спречи или намали корупцијата, дел од нив се имплементирани а дел треба допрва да се имплементираат.
Корупцијата е клучниот проблем со кој се соочуваат холандските компании кои работат во Македонија кажа амбасадорката Узлем Џанел а тоа било потврдено од интерна анкета која била спроведена меѓу холандските инвеститори.
Од Центарот за граѓански комуникации реагираат и на предложените измени на Законот за јавни набавки кои одат по скратена постапка а според кои драстично се намалуваат ингеренциите на Бирото за јавни набавки како и транспарентноста на самиот процес.
На овие законски измени реагираа и од Антикорупциската комисија како и опозициската СДСМ.
Огнен Чанчаревиќ