Јаник Синер очекувано ја завршува 2024 година убедливо на првото место на АТП ранг-листата, која денеска излезе за последен пат сезонава. Новак Ѓоковиќ пак доживеа нов пад и го има најслабиот ранкинг уште од 2017 година.
Синер го потврди приматот светски рекет број 1 со синоќешната победа на АТП-финалето во Торино и 2024 година ја завршува со 11.830 бодови. Зад него е Александер Зверев со 7.915 бодови, додека трет е Карлос Алкараз. Тејлор Фриц напредуваше една позиција и моментално го има најдобриот ранкинг во кариерата на 4.место. Данил Медведев е петти, а на шестото место скокна Каспер Руд.
Новак Ѓоковиќ ја завршува сезоната на седмото место со 3.910 бодови и без ниту една АТП титула. Ова е најлошиот ранкинг на Србинот во последните седум години, кога сезоната ја заврши на 12.место. Единствениот триумф на Ѓоковиќ годинава дојде на Олимписките игри во Париз, каде дојде до единствената круна што му недостастуваше во кариерата.
Најдобрите десетмина на последната АТП-листа за 2024 година ја комплетираат Андреј Рубљов, Алекс де Минор и Григор Димитров.