Првиот носител Јаник Синер ќе се соочи со Данил Медведев во рамки на четвртфиналето на Ју-Ес Опен. Пласман меѓу најдобрите осум обезбеди и првата фаворитка кај тенисерките Ига Швјонтек.
Синер во три сета со 7-6, 7-6 и 6-1 го елиминираше Томи Пол и во четвртфиналето ќе игра со Данил Медведев. Русинот пак лесно и убедливо го совлада Нуно Борхес со 6-0, 6-1 и 6-3.
Џек Дрејпер во три сета беше подобар од Томаш Махач и во следната рунда за противник го има Алекс де Минор, кој пак со 3-1 го победи својот сонародник од Австралија, Џордан Томсон. Останатите четвртфинални двојки се Григор Димитров против Франсес Тиафо и Александер Зверев против Тејлор Фриц.
На женскиот дел од грен слем турнирот, првата фаворитка Ига Швјонтек со 6-4 и 6-1 ја победи Људмила Самсонова. Полјачката во четвртфиналето ќе ги одмери силите со шестата фаворитка Џесика Пегула, која пак беше подобра од Дијана Шнајдер во два сета.
Каролина Мухова ја изненади петтата фаворитка Јасмин Паолини и тоа во два сета со по 6-3, па чешката тенисерка во четвртфиналето ќе игра против Беатриз Хадад-Маија, која пак во три сета триумфираше против Каролин Вожњацки. Преостанатите две четвртфинални двојки се Паула Падоса против Ема Наваро и Арина Сабаленка против Чинвен Жанг.