Првиот фаворит Јаник Синер и Данил Медведев се на добар пат да закажат меѓуебно четвртфинале на Ју-Ес Опен. Правиме преглед на мечевите одиграни утринава и синоќа на последниот сезонски грен слем турнир.
Синер во три сета со 6-1, 6-4 и 6-2 го совлада Кристофер Оконел за пласман во осминафиналето. Следен ривал на Италијанецот е домашнот фаворит Томи Пол. Во осминафиналето се пласираше и петтиот фаворит Данил Медведев, кој утринава исто така во три сета со 6-3, 6-4 и 6-3 го елиминираше Флавио Коболи од Италија.
Десеттиот фаворит Алекс де Минор го победи Даниел Еванс во четири сета, а во осминафиналето е и Нуно Борхес од Португалија. Во следната рунда се пласираа и Џек Дрејпер и Томаш Махач.
На женскиот дел од турнирот, првата носителка Ига Швјонтек ја совлада Анастасија Павључченкова со 6-4 и 6-2. Полјачката во осминафиналето ќе се соочи со Људмила Самсонова. Поранешната најдобра светска тенисерка Каролин Вожњацки ќе игра во осминафиналето по триумфот над Џесика Понче со 6-3 и 6-2. Во следната рунда се пласираше и петтата фаворитка Јасмин Паолини по победата над Јулија Пуницева во два сета, а во осминафианалето е и шестата носителка Џесика Пегула откако ја елиминираше Џесика Бузас Манеиро.