Витомир Трајковски и Стефан Стојановиќ, како највисоко рангирани каратисти од Македонија, ќе се натпреваруваат на турнирот на Светската младинска лига во Шпанија. Постарите јуниори (У21) и членови на скопски „Макпетрол“ во Ла Коруња, ќе бидат предводени од тренерот Петар Заборски. Трајковски и Стојановиќ, викендов се вратија од Европскиот Шампионат кој се оддржа во Хрватска.
На собирот од светската младинска карате лига во Шпанија, што ќе се одржи од 16 до 19 мај, ќе учествуваат 3,032 спортисти од 76 држави. Најдобрите македонски репрезентативци и освојувачи на европски и светски медали, Трајковски и Стојановиќ, ќе бидат дел од силниот турнир во Ла Коруња. Нивната цел е да ја задржат или да ја подобрат својата позиција на светската ранг листа на Светската карате федерација (WKF).
Во изминативе две години, Витомир Трајковски е прворангиран на светската ранг листа во категоријата под 84 килограми. На глобалното рангирање на WKF, во категоријата над 84 килограми, Стефан Стојановиќ е на втората позиција.