Иако Битиќи е надлежен во владата и го води телото за меѓународни арбитражи, денеска рече дека се уште не го добил писмото кое од ДКСК е препратено на Илинденска со иницијатива да се покрене спор против ОКТА откако Антикорупциска утврди тргување со инсајдерски информации и злоупотреби при набавката на мазут за ТЕЦ Неготино.
Целиот извештај е доставен и до владата за да разгледа можност и да покрене меѓународен спор со Хеленик за евентуално прекршување на меѓународниот договор за купопродажба на рафинеријата која сега е ОКТА поради некористење на нафтоводот. Ама не стигнал и до вицепремиерот надлежен за тие работи.
Битиќи вели дека ја гледал емисијата КОД на тема мазут за ТЕЦ од РКМ виа ОКТА и Хеленик и дека аргументите кои ги спомнува Антикорупциска во својот извештај биле употребени од владата во постапките на меѓународна арбитража.
ОКТА односно Хеленик досега водеше две постапки против Македонија, по кои Македонија е осудено да и плати на грчката фирма над 61 милион евра за отштета бидејќи не бил почитуван договорот од 1999-та. Договорот имал правна важност до 2019-та.
Но, при енергетската криза пред две години, ОКТА во понуда до ЕСМ доставила одговор дека не може да испорача доволно мазут за потребите на ТЕЦ Неготино, што всушност според ДКСК е спротивно на количините гарантирани со договорот, кој е истечен во 2019-та.. Тендерите потоа ги добива РКМ кој мазутот го купува од Хеленик и го носи во ТЕЦ иако ДКСК откри намалена количина доставена до електраната.
Поради злоупотребите кои овозможиле ваква набавка, ДКСК поднесе до Организиран Криминал и иницијатива за кривично гонење против министерот Крешник Бектеши и поранешниот директор на ЕСМ Васко Ковачевски.
Миомир Серафиновиќ