Обидувајќи се да поправат една штета, направиле друга. Поради пукната водоводна цевка во Центар вчера беа поплавени неколку домови. Вработените од „Водовод“ обидувајќи се да се справат со поплавата предизвикана од пукнатата цевка, оштетиле друга која носи вода до еден од оштетените домови. Денеска сите добија вода, освен тие. Немаат вода за пиење, бидејќи таа сега завршува во нивниот двор. Се јавиле во „Водовод“ и побарале помош, но денеска нема да ја добијат. Од „Водовод“ објаснуваат дека екипите работеле деноноќно и замолија оштетените да се стрпат до утре.
„ Вчера бидејќи имаше поголема количина на вода и дел од таа вода беше дојдена до неговиот објект. Со цел да се оневозможи поплавување на објектот од страна на нашите екипи направен е дренажен канал со цел да се издренира таа вода за да не навлезе во објектот. Бидејќи колегите како што ви спомнав рано утрово дури до 4 часот и истите се преморени. Во кординација со господинот договорено е утре рано изутрина нашите екипи да излезат на терен и да го санираат настанатиот дефект“, вели Горан Ковчегарски, раководител на сектор Водовод.
Градоначалникот на општина Центар вели дека иако проблемот е настанат од страна на градското претпријатие, тие како општина ќе се обидат да помогнат.
„Јас во текот на денешниот ден бев на терен, во домаќинствата и фирмата која што работи со медицинска опрема за да видиме какви штети се направени. Како општина ќе поразговарме, ќе ги поканиме и фирмата и луѓето кои што имаат штета во текот на утрешниот ден за да видиме колкави се штетите и што ние како општина можеме да помогнеме“, вели Горан Герасимовски, градоначалник на Општина Центар.
Околу 18 часа вчера граѓаните на Центар беа оставени без вода. Од „Водовод“ кажаа дека е сериозен проблем затоа што се работи за голема водоводна цевка. Додека се санираше дефектот, цистерна со вода ги снабдуваше погодените територии. Од рано изутринава дефектот е решен и сите граѓани имаат вода. Останува да се изврши проценка на материјална штета.
Тамара Марковска