Македонската кошаркарска репрезентација загуби од Израел со 65-86 во првото коло на претквалификацискиот турнир што се одржува во Талин за пласман на Олимписките игри во Париз 2024 година. Нашиот тим беше немоќен да му се спротивстави на фаворитот, па шанса за подобар резултат ќе бараме на следните два натпревари.
Подмладената Македонија во ниту еден момент од натпреварот не беше закана за Израел, кој постепоено го градеше водството. На полувремето беше 38-47 за противникот, но лошата трета четвртина на Македонија значеше и убедлива негатива. Па по три четвртини веќе губевме со 21 поен разлика. Во финишот Израел поведе и со +29 поен, но потоа подзастана што и дозволи на Македонија да направи серија и да ја намали негативата за конечни 65-86.
Ти Џеј Шортс очекувано беше наш најдобар играч со 22 поени, а Андреј Магдевски имаше 11. Кај Израел најдобар беше Роман Соркин со 21 поен.
На првиот натпревар во нашата група денеска, Чешка ја совлада Естонија со 77-74. Во второто коло утре, Македонија се среќава со домаќинот на турнирот Естонија со почеток од 18 часот, додека во последното коло во вторник играме и со Чешка.