Дисциплинската комисија на УЕФА за однесувањето на навивачите пред и за време на натпреварот против Шкупи во Скопје на Левски му изрече казна од 40.000 евра.
Во образложението на одлуката стои дека бугарскиот клуб е казнет за дискриминаторско однесување на навивачите вклучувајќи и скандирање на етничка основа како и испраќање на политички пораки. Причина за изрекување на казната се и инцидентите кои навивачите ги предизвикале на трибината каде што беа сместени.
Покрај оваа санкција, Левски на следното гостување во европските клупски натпреварувања нема да може организирано да води навивачи, а доколку во иднина се направи ново прекршување на правилата следува и казна од еден натпревар на домашен терен без публика.
Во објавата за изречената казна Левски на своите навивачи им порача на натпреварот против Шкупи што ќе се одигра в четврток да се однесуваат спортски и да не скандираат пораки на национална, расистичка, ксенофобична основа, да нема политички пораки и да нема насилство пред, за време и по завршувањето на натпреварот.
ФОТО: Игор Паневски