Фирмите кои вршат набавка на гас во земјава, за да го сторат тоа ќе мора да одат до Бугарија за да добијат код – неопходен за да го донесат енергенсот. Известување за новите правила за тргување добиле на само две недели пред Нова Година и тоа преку официјалниот сајт на Гама.
Тоа ќе мора да го прават, затоа што Владата, иако е обврзана со закон, сè уште нема сертифициран оператор за пренос на природен гас.
Оваа обврска ја наметнува членот 109 и 113 од Законот за енергетика, според кој носителот на дејноста – пренос на природен гас, мора да биде сертифициран оператор. Но, пред да биде формирано ова тело, државата склучи договор со Бугарија за проширување на капацитетот на интерконекторот кај Жидилово.
За да се формира сертифициран оператор во Македонија, мора да се заврши процесот на спојување на НЕР и Гама. Откако ќе се случи тоа, европскиот систем оператор ЕНЦО треба да му даде дозвола да ги издаваат потребните кодови за македонските фирми да можат да го донесат гасот во земјава, а тоа да не го прават преку Бугарија.
Од Гама за Телма потврдија дека на почетокот домашните фирми кои се бават со овој бизнис ќе бидат принудени потребниот код за гас да го обезбедат од „Булгартранс гас“.
Но, се сигурни дека до Нова година ќе се заврши процесот на спојување на Гама и НЕР и процесот на сертифицирање.
Дека до 31.12. регулаторна ќе ги донесе и законските регулативи и со тоа од 1 јанаури да почне процесот на либерализација на пазарот со природен гас. Сепак, со ова се отвора прашањето дали фирмите кои се дел од бизнисот со гас, ќе имаат доволно простор и време да се запознаат со новите правила на игра и да тргуваат.
Со Законот за енергатика, кој се донесе во 2018 година, се наметна обврската државата да формира сертифициран оператор за пренос на природен гас, но и да се донесат подзаконските акти за тргување на овој пазар.
Ирена Чачкова