ЕСМ ги троши последните количини на гас кои ги има на располагање за непречено функционирање на топланите Исток и Запад и снабдување на скопјани со топлинска енергија.
Гасот наменет исклучиво за топланите беше купен кон средината на месецот беше наменски и за периодот до 30 ноември односно до среда.
Засега нема нова набаква на гас за двете скопски топлани а од ЕСМ без прецизен одговор дали кога и колку гас ќе набават.
„ Гас и средства има на располагање и нема да има никакви проблеми за испорака на парно греење“ – тврдат од ЕСМ.
ЕСМ на 12 ноември соопшти дека купи гас со кој ќе се покрие производството на топлинска енергија до крајот на месецот и дека набавките ќе продолжи да ги прави за покуси временски периоди за да се искористи падот на цената на енергенсот.
Планот на државната компанија беше и да се користи дизел горивото како примарен енергенс за затоплување на домовите иако беше најавено како тест период од десетина дена.
Имено ЕСМ побарале дизел горивото да биде основното гориво за произвеодство на топлинска енергија но министерството за животна средина не даде дозвола и го одби барањето.
Освен дизелот, топланите Исток и Запад со кои раководи ЕСМ не може да користат ниту мазут, иако во дозволата овој енергенс стои како опција бидејќи немаат филтри на оџаците.
Од екологија апелираа државната компанија да користи гас за производство на топлинска енергија бидејќи е достапен на пазарот и е најмалку штетен по животната средина и здравјето на граѓаните.
Огнен Чанчаревиќ