Министерот за правда, Никола Тупанчевски најави поместувања во правосудниот систем.
Треба да се детектираат и да се отстранат аномалиите, потенцираше тој во вечерашната „Вин-Вин“ на Телма, но се воздржа од коментар за случајот со екс-претседателот на кривичен, Владимир Панчевски, кој денеска излезе од затвор.
Тупанчевски смета дека постои потреба од детектирање на состојбите и брзо да се реагира за отстранување на одредени аномалии коишто се составен дел од правосудниот систем.
– Дефинитивно никогаш повеќе не треба да се повикуваме дека криво е правосудството. Ќе треба еднаш засекогаш да застанеме и дадеме име и презиме, идентификација, да се персонализираат и состојбите, меѓутоа и лицата кои придонесуваат за таквото негативно стојалиште или негативен став кон овие состојби, изјави Тупанчевски.
Вели дека капацитетот на Министерството за правда во моментот е насочен кон тоа да направи колку што е можно повеќе за да се создадат оптимални услови за некои состојби да не се повторуваат.
– Факт е дека треба да се менуваат работите. Стојам на тоа дека тоа не може да се направи преку ноќ или некои состојби што траеле со декади наназад би можеле да се решат за месец и еден ден, колку што сум на позицијата. Верувам дека ќе имам малку повеќе можности, разбирање и соработка со сите останати инститиуции чија што задача е да стигнеме до она што се нарекува правда, изјави Тупанчевски во интервјуто за Вин-вин на Телма.