Европското првенство во ракомет во машка конкуренција стигна до самата завршница. Денеска ќе бидат познати освојувачите на трофеите на континенталниот шампионат чии домаќини се Унгарија и Словачка.
По пауза од четири години Шпанија и Шведска повторно или вкупно трет пат ќе се соочат во решавачката битка за златото на европските првенства. Во Загреб триумфираше Шпанија која од тој момент ја почна серијата победи и денеска во Будимпешта ќе се обиде по трет пат едно по друго да се искачи на највисокото место на подиумот и да го повтори подвигот токму на Швеѓаните кои во периодот од 1998 до 2002 беа суверени владетели во европскиот ракомет.
Двете селекции по трет пат во историјата ќе се соочат во финалето, Шведска беше поуспешна во Болцано пред 24 години, а веќе споменавме дека Црвената фурија славеше во Хрватска. Шпанците со евентуален триумф може да израмнат уште еден рекорд на денешниот противник, кој со четири злата е рекордер на европските првенства.
Двете репрезентации во минатото одиграле вкупно 25 натпревари, за нијанса подобра е Шпанија со 14 победи од кои дури осум по ред во последниве 13 години. Последен пат Шведска на победа се радувала во 2009-тата кога на Мундијалот во Хрватска славеше со 34:30. Последното соочување беше токму на овој шампионат во фазата по групи и Црвената фурија забележа победа од 32:28.