Ракометарите на Еурофарм Пелистер утре од 20 часот и 45 минути во Битола во првиот натпревар од осминафиналето во Лига Европа го пречекуваат германскиот претставник Магдебург.
Гостите од Германија имаат статус на фаворит, но тоа не е причина избраниците на тренерот Жељко Бабиќ да се обидат да направат изненадување и по првиот меч во Битола да обезбедат предност која ќе им даде надеж дека може да се мине првата пречка во елиминациската рунда од второто по ранг европско клупско ракометно натпреварување.
“Магдебург е одлична екипа и игра во одлична форма. Наша цел е барем да извадиме нерешен резултат на првиот натпревар во Битола. Ќе биде добро да заминеме во Германија со позитива. Добро играме и ние, и ние сме во добра форма како и тие. Детали ќе одлучуваат, па ако бидеме на ниво, мислам дека ќе патуваме за Магдебург со позитива. Мислам дека поголем предизвик е за нив да ја освојат Битола. Ние играме добра сезона, добро играме на домашен терен и верувам дека тоа ќе го потврдиме во вторник. Магдебург е одлична екипа, играат добра одбрана, многу трчаат и влечат полуконтра. Наше е да се враќаме брзо и да трчаме. Мислам дека не треба да дозволиме да нè наттрчаат”, изјави голманот на Еурофарм Пелистер, Градимир Чаневски.