Иницијативниот одбор ги собра потребните потписи на мнозинството делегати и одлучи на вонреден конгрес да побара отчет за сработеното и гласање доверба на актуелниот лидер Христијан Мицкоски. Сметаат дека е недозволиво, претседателот на кој што му ја дале довербата да не свика конгрес и не се обиде да им објасни кои се причините за последователните изборни порази и катастрофалниот рејтинг.
Од ВМРО-ДПМНЕ велат дека ваквиот конгрес ќе биде нелегитимен и спротивен на новиот статут на партијата.
ВМРО-ДПМНЕ: Оваа иницијатива не е статутарна ниту е правна.Ова е политичка иницијатива на група на луѓе кои што имаат за цел да му помогнат на Заев, да му фрлат гума за спасување и да го одвлечат вниманието. Ваквата иницијатива политички гледано е координирана со Заев на кого што му е очајно потребен дефокус од лошите политики чија што цена ја плаќаат граѓаните со економскиот и здраствен колапс.
Иницијативниот одбор смета дека нема ништо спорно во иницијативата.
Во наредните денови ќе се формираат телата на Иницијативниот одбор, ќе се промовира слоганот и ќе почне со дистрибуција на покани и материјали за делегатите. Доколку по одржаиот конгрес актуелното раководство не ги прифати донесените одлуки, ќе се побара разврска по судски пат.
Јулијана Пешевска