Не стана прв премиер Албанец, но сега ќе ги брани граѓаните од системот на власта. Насер Зибери, кој на последните избори беше кандидат на ДУИ за премиер, денеска седна во фотељата на Народниот правобранител.Тврди дека не е член на партијата што го кандидираше и ги отфрла обвинувањата на опозицијата дека, оваа функција му е награда за неговата услуга, да прифати кандидатура.
Зибери беше избран за Народен правобранител на 25 јануари годинава. Во последните години работеше како нотар, а претходно во три наврати беше избиран за пратеник во Собранието. Од 1996 до 1998 година беше и министер за труд и социјална политика, како и потпретседател на владата.
Тој ќе ја наследи функцијата на Иџет Мемети кој беше на чело на институцијата 16 години, односно два мандати по осум години.
Опозицијата не гласаше за Зибери. Ја напуштија седницата, откако ВМРО ДПМНЕ реагираше дека треба да докаже дека нема да работи по диктат на партијата што го избра, а од Левица тврдеа дека ниту една етничка група или граѓанин нема да имаат корист од него. Алијанса и Алтернатива најавија дека неговиот избор ќе го оспорат пред Уставен суд.
Тие и денеска имаа најавено изјава, но ја добија само албанските медиуми.Уште пред прес конференцијата, македонските медиуми беа предупредени дека нема да добијат изјава на македонски јазик.
Далиборка Демјанска Цветановска