Деведесетгодишна жена е првиот човек на светот кој прими вакцина против ковид-19 надвор од тестирањата, откако Велика Британија денеска ја почна масовната програма на вакцинирање, што беше наречено Денот В. Маргарет Кинан, која следната недела ќе наполни 91 година, кажа дека ова ѝ е најдобриот роденденски подарок.
Во центрите низ земјата прво ќе се вакцинираат лица над 80 години и некои здравствени работници и вработени во старечки домови. Тие ќе ја примат вакцината што заеднички ја развија „Фајзер“ и „Бионтек“, која на тестирањата покажала 95-процентна ефективност.
Кинан ја примила вакцината во Универзитетската болница во англискиот град Ковентри.„Се чувствувам привилегирано што сум првата личност која се вакцинира против ковид-19. Ова е најдобриот роденденски подарок што можев да го посакам и значи дека во новата година ќе можам да поминам малку време со семејството и пријателите, откако речиси цела година бев сама“, изјави Кинан.
Велика Британија е прва земја на светот која одобри вакцина против ковид-19 и до крајот на годината се очекува да бидат вакцинирани околу 400.000 луѓе.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.